Indi na makahampang pa ang isa ka atleta gikan sa Region 10 sa 2026 National Private Schools Athletic Association (PRISAA 2026) nga patigayonon sa Bacolod City matapos mapilasan sang narumpag ang inodoro sang ila billeting school sa Negros Occidental High School (NOHS).
Sa interview sang Bombo Radyo Bacolod kay Dr. Ryan Mark Molina, Presidente sang National kag NIR PRISAA, patigayonon na sa Sabado, Mayo 9 ang opening sang PRISAA kag ini magalawig tubtob sa Mayo 15.
Suno diri, kapin sa 12,000 ka delegates ang ginalauman nga magapartisipar apang ginabanta nga 70 percent pa lang ang naka-abot sa ciudad apang subong nga adlaw ginalauman sini nga madamo pa gid sang maga-abot.
Suno kay Molina, halos maayo ang mga nagakabaton sini nga feedback sa mga billeting schools nga gingamit kag nakita man sini nga nalipay ang mga small business owners sa ciudad.
Apang, may isa ka atleta nga indi na mahimo pa makapartisipar sa taekwondo bangod napilasan ini sa buli matapos marumpag ang inidoro sa billeting school kun diin ini na-assign.
Siya yara sa karun sa ospital para mahatagan sang nagakaigo nga pagbulong.
