Nagdangop sa Bombo Radyo Bacolod ang pila ka mga tricycle drivers nga wala nakakuha sang P5,000 fuel subsidy sa panindugan nga sila ang wala napahibalo sang petsa sang payout.
Apat ka tricycle drivers gikan sa Brgy Granada, Banago, Tangub, kag Villamonte ang nagpadulong sa estasyon bilang representante sang madamo nga mga tricycle drivers nga wala makakuha sang fuel subsidy sang Department of Social Welfare and Development.
Sa interview sang Bombo Radyo Bacolod kay Jordy Rolan, colorum driver sa Brgy Granada, nakahibalo sila nga nalakip sa listahan ang ila nga pangalan, bangod ini ang ila nakita.
Apang sa una nga payout sang Abril 25 sila ang wala napahibalo.
Sa baylo, nakabatun na lamang si Rolan sang mensahe sang Mayo 4 nahanungod sa natapos na nga payout Pahayag sini nga sa pagpadulong nila sa Department of Social Services – Bacolod, sila ang ginpangayuan lamang sang ID number kag cellphone number, kag ginpasalig nga tawagan na lamang para sa masunod nga payout.
Apang sa sunod nila nga pagpadulong sa DSSD nakaligad nga semana, ginhambalan sila nga natapos na ang payout sang Mayo 7.
Panindugan ni Rolan nga sila ang wala sang nabatun nga tawag ukon text messages.
Liwat nga ginkuha sang staff sang DSSD ang ila pangalan kag nagpahayag nga lantawon na lamang kun sila ang pwede pa nga makabatun sang ayuda.
Madumduman nga una na nga ginpahayag sang DSWD nga ang mga tricycle drivers nga indi gihapon makakuha sang ila fuel subsidy ang indi na makabatun, kag ang para sa ila nga ayuda ang ihatag na lamang sa mga yara sa waiting list.
Hingyo ni Rolan nga sila ang mahatagan pa sang kahigayunan nga makabatun, bangod ini ang kinahanglan man nila.
