24 patay, masobra 50 pilason, sa suicide car bombing nga nagtarget sang tren nga may sakay nga mga suldado sa Pakistan

Indi magnubo sa 24 ka tawo ang napatay kag masobra 50 ang pilason matapos ang isa ka suicide car bomb attack nga nag-igo sa tren nga may sakay nga mga suldado sa Quetta, Balochistan sa Pakistan.

Gin-ako sang Balochistan Liberation Army ang pag-atake, nga nagtuga sang dako nga halit sa mga kalapit nga pamalay, samtang nagbaliskad kag nasunog ang pila ka mga tren.

Gindeklarar naman ang ‘state of emergency’ sa pila ka mga pampubliko nga ospital sa Quetta.

Sa pihak nga bahin, hugot nga ginkondenar ni Pakistani Prime Minister Shehbaz Sharif ang insidente kag nagpasalig nga mas pabaskugon ang kampanya batok sa terorismo.