Ginklaro ni Councilor Wilson Gamboa nga sarang mapaidalom sa public auction ang mga salakyan nga ma-impound sang traffic authority kun indi maclaim sang tag-iya.
Sa interview sang Bombo Radyo Bacolod sa konsehal, may-ara na ngadaan sang National Law, kag ini ang nasuportahan pa sang local ordinance nga ginpasar sa konseho sang Bacolod sang 2017.
Apang indi kaangay sa National Law nga tatlo ka bulan lang sarang na nga ma-auction, sa City Ordinance No 09-17-818, ang tag-iya ang ginahatagan pa sang anom ka bulan nga isettle ang penalty.
Kalakip diri ang mga salakyan nga ma-tow bangod sa illegal obstruction, kaangay sang mga guba nga salakyan nga ginpabay-an lang sa kilid sang dalan.
Lakip man diri bisan ang mga foodcart nga nagaserbe na nga obstruction, kag indi man exempted ang mga e-mobile ukon electronic vehicle.
Suno kay Gamboa, nalakip diri ang mga nagapark sa bike lane, nga iya man nga ginapasalamat bilang author sang bicycle lane ordinance sa ciudad.
Ang Bacolod Traffic and Transport Management Department (BTTMD) ang magapatigayon sang public auction.
Kun guba nagid ang mga salakyan, ini ang sarang man nga mapabid sa mga junkshop.
Ang proceeds gikan sa public auction ang gamiton naman sang City Treasurers Office sa pagbayad sa penalties, clamping ukon towing fee, storage ukon impounding fee, kag iban pa nga galastuhan lakip na ang publication sa auction.
Sa pihak nga bahin, ang mga gin-impound nga involved sa aksidente ukon gingamit sa criminal activities ang magakinahanglan naman sang court order antes mapa-auction.
Pahanumdom ni Gamboa nga may-ara na sang national law, may ara na sang ordinansa, bastante naman ang education campaign, gani ang liyabi na lamang ang yara sa implementasyon sang BTTMD.
