Patay ang tatlo ka tuig nga bata matapos nga mabungguan sang bus ang ginasakyan sini nga e-bike sa Rizal Highway – Bangga Bulangan Road, Barangay 5, Silay City, Negros Occidental sang Hunyo 1.
Sa interview sang Bombo Radyo Bacolod kay Police Lt. Col. Edison Garcia, hepe sang Silay City Police Station, ang ceres bus nga ginamaneho ni alias Renren, 43 years old, lalaki, kasado kag residente sang Hacienda Canibingan, Barangay Luna, Cadiz City, Negros Occidental kag ang taxi nga ginamaneho ni alias Deme, 54 anyos, lalaki, kasado kag residente sang Purok Mahimulaton, Barangay Banago, Bacolod City ang nagasundanay.
Ang mga ini ang nagabiyahe padulong sa Silay City Proper apang pag-abot sa lugar nagliko ang taxi rason nga naglikaw ang bus kag nagderecho sa nagapundo nga e-bike nga hana kuntani magtabok.
Sakay sa e-bike nga ginamaneho sang ila tiyo ang duha ka mag-utod nga menor de edad nga nagaedad sang apat kag tatlo ka tuig.
Bangud sa impact nagtabog ang sakay sang ebike kun sa diin gindala man ang mga ini sa ospital apang ang tatlo ka tuig nga bata ang gibawian sang kabuhi samtang ang apat ka tuig kag ang tiyo ang yara na sa maayo nga kahimtangan.
Nakagwa na ang driver sang bus kag taxi sa Silay City Police Station matapos ang reglementary period.
May inisyal nga pag-estoryahanay sa pamilya sang biktima kag mga imbulbado sa aksidente kun sa diin pagasabton nalang ang pagpalubong sang biktima kag magahatag sang masarangan nga bulig.
