Gindayaw ni Bacolod City Police Office (BCPO) Director Police Colonel Eugene Rebadomia ang kapulisan sa pagdakop sa duha ka mga lalaki nga suspek sa pagpanghold up sa ciudad.
Sa interview sang Bombo Radyo Bacolod kay Police Colonel Eugene Rebadomia, nadakpan ang duha matapos nga ginsita sang kapulisan bangod nagasuksuk ang mga ini sang helmet kag may facemask pa.
Ginpakakas sang mga pulis ang ila facemask apang nagpamalibad ang mga ini kag amo na naggabot sang armas ang isa.
Ang mga nadakpan amo sanday Bernard Traje, 29 anyos, kasado, residente sang Prk Saging, Brgy Igmayaan, Don Salvador Benedicto; kag Romeo Araiz, 28 anyos, single, residente sang Prk Jalandon, Brgy 2, Bacolod City.
Suno kay Rebadomia, isa sa ila may yara sang kaso kag under probation pa.
Suno diri, ang duha indi kabahin sang mga grupo sang mga nagapangholdup kag natimingan gid nga nadakpan sila.
Pahanumdom sini, indi magduha-duha nga magtawag sa kapulisan kun may yara sang ginadudahan. Samtang nagpahanumdom ang Bacolod City Police Office sa mga kapulisan nga mangin alerto sa tanan nga tion.
Ini kasunod sang natabo nga pagtiro sa duha ka intelligence officer sang City Drug Enforcement Unit sang gina-alegar hold-upper sa atubang sang Bureau of Jail Management and Penology office sa Magsaysay Avenue, Brgy Singcang-Airport, Bacolod City sang Miyerkules sang gab-i.
Ang imbulbado ang ginalakipan sang isa ka Police Corporal, isa ka Patrolman; kag ang duha ka suspect nga ginkilala nga sanday Bernard Traje, 29 anyos, residente sang Don Salvador Benedicto; kag Romeo Araiz, 28 anyos, residente sang Brgy 2, Bacolod City.
Sa interview sang Bombo Radyo Bacolod kay BCPO Director Police Col. Eugene Rebadomia, ginpalapit sang mga intel officers ang mga suspect matapos matalupangdan nga malawig na nga nagasunod sa ila.
Ang mga ini ang sitaon kuntani sang kapulisan bangod sa nakahelmet, may bonnet, kag may facemask, kag panugyanan nga kuhaon nalang ang facemask kag bonnet bilang kabahin sang tikang sa pagtapna sang kriminalidad.
Ang tikang ang ginhimo matapos ang pila na ka kaso sang shooting kag robbery holdup incident nga natabo sa ciudad.
Apang bangod may armas kag suspected shabu, gani naghunos na lamang sang armas ang isa sa mga suspect kag ginpalukpan ang Police Corporal.
Ini ang wala maigo, samtang nakabalos man sang pagpalupok ang Patrolman, apang nakapalagyo na ang mga suspect.
Sila ang natigayon nga madakpan paagi sa hot pursuit kag drag net operation.
Panawagan ni Rebadomia sa mga pumuluyo nga ireport sa 911 kun may matalupangdan nga makaduluda nga mga persona, agud gilayon nga marespondihan.
Samtang pahanumdom man sini sa mga police personnel nga indi magkumpyansa kag permi nga mangin alerto.
