Ginpahayag sang hepe sang Bago City Police Station nga may yara na sang nabaton nga pagpamahog ang 41 anyos nga babayi nga gintiro-patay sa atubang sang Negros Occidental District Jail sa Purok Province, Barangay Tabunan, Bago City, Negros Occidental, sang Hunyo 6 sang hapon.
Ang biktima ginkilala nga si Ma. Lowela Foster, kasado kag residente sang Barangay 2, Manapla, Negros Occidental.
Sa interview sang Bombo Radyo Bacolod kay Police Lt Col. James Latayon, ginbuyagyag sang kalive in sang biktima nga may yara ini nga nabaton nga pamahog sa kabuhi gikan sa ila mga upod nga drug personality sang-una.
Suno kay Latayon, wala pa sila sang person of interest kag nagapadayon pa sa karun ang imbestigasyon sang mga kapulisan sa kaso nga pagpatay sa biktima.
Ginalantaw nga motibo sa krimen ang illegal nga druga.
Madumduman nga sang Sabado, matapos nga magbisita, naggwa si Foster sa district jail kaupod sanday Jojie Morales kag Lorna Mugat nga lunsay residente sang Barangay Sta. Teresa, Manapla kag masakay na kun tani sa tricycle nga ila gin-arkila nga ginamaneho ni Meriam Pagatpat nga residente sang Barangay 1-A, Manapla.
Apang sang naghana nga magsaka si Foster sa tricycle, may nagpalapit nga motorsiklo sakay ang duha ka tawo.
Hinali lang nga ginluthang sang riding in tandem suspects si Foster gamit ang caliber .45 pistol kun sa diin nag-agom ini sang igo sang bala sa guya nga nagresulta sa gilayon sini nga kamatayon.
Ang nagamaneho sang motorsiklo nagasuksuk sang yellow-gold sweatshirt samtang ang backrider naman nagasuksuk sang black T-shirt kag sila lunsay wala sang helmet apang nagasuksuk sang black nga bonnet.
