Ginpahanumdom sang Philippine Coast Guard Station Northern Negros Occidental ang mga requirements sa mga coastal beach resorts agud maseguro ang kahilwayan sang mga bisita.
Ini kasunod sang pagkalumos sang student athlete nga sanday Rene Clert Baterbonia kag Divine Adili sa pagpatigayon sang Ateneo Men’s Basketball Team sang team building activity sa beach resort sa Dipaculao, Aurora sang Hunyo 8.
Sa interview sang Bombo Radyo Bacolod kay Commander Artzell Anacan, ang PCG ang may-ara sang Maritime Safety Services Unit (MSSU) nga amo ang incharge sa recreational safety enforcement inspection sa mga coastal beach resort.
Apang sila ang wala sang standby personnel nga nagatinir sa mga beach resort, sa baylo ang mga ini ang nagaseguro nga nagasunod ang mga negosyo sa requirements.
Kalakip diri ang paghamtang sang lifeguard kada 20 metros, may lifeguard tower, binoculars, radyo, pito ukon whistle, kag mga floating device kaangay sang lifebouy ring.
Kinahanglan man nga may markings kun diin ang designated swimming area, kasubong man may danger mark sa mga bahin nga may rip current nga nagabutong sa mga nagapaligo paidalom.
Suno kay Anacan, kun maglapaw na sa designated swimming area ang mga nagapaligo, sila ang dapat ginapituhan na sang life guard.
Samtang sa mga nagapatigayon sang team-building activity, panugyan sini nga dapat panilagan ang tiyempo.
Kalakip man sa masami nagatuga sang pagkalumos amo ang pagpaligo nga yara sa impluwensya sang makahulubog nga ilimnon.
Ang insidente ang masami naman nagakatabo sa tion sang gab-i, gani sarang gid makapagwa sang polisa ang mga resort sa pagregulate sang pagpaligo sa kritikal nga mga oras.
