Natukiban nga involved na sa pila ka kaso ang pulis nga gin-alegar nagpangilkil sa isa ka police applicant.
Sa interview sang Bombo Radyo Bacolod kay Atty. Owen De Luna, spokesperson sang National Police Commission-Negros Island Region (NAPOLCOM NIR), involved man sa pila ka administrative case ang pulis may kaangtanan sa kwarta.
Suno diri, padayon pa ang imbestigasyon bangod indi lamang isa ang kaso sang pulis kag may mga complainant man angot sa iya nga mga ginhimo.
Suno kay De Luna, sa karun ginatun-an pa kun ano ang status sang pulis, kun ano ang iya nga role kag kun diin ini na-assign. Samtang,nagpaandam ang Police Regional Office – Negros Island Region sa mga luyag mag-apply sa Philippine National Police nga indi magpati sa mga nagapasalig sang mahapos nga application basta may yara sang involved nga bayranay.
Sa interview kay PRO NIR Director Police Brig Gen Romano Cardiño, napasakaan na sang criminal case nga robbery-extortion ang pulis nga nagpangilkil sa isa ka police applicant.
Suno diri, ginatun-an pa ang administrative case nga mahimo ipasaka batok sa pulis.
Paandam ni Cardiño, indi magpati sa mga nagapangilkil para lamang makakuha sang slot kag naghatag man ini sang mensahe sa mga pulis nga indi mang-into agud indi mauyang ang ila trabaho bangod ang madakpan sigurado nga idismiss sa serbisyo.
