Pilason ang Grade 9 student matapos ginbuno sang isa man ka Grade 10 student sa gwa sang Julio Ledesma National High School, San Carlos City alas-3:40 kaina sang hapon, Hunyo 23.
Ang biktima kag suspect ang naga-edad sang 17.
Sa interview sang Bombo Radyo kay Police Lieutenant Colonel Nazer Canja, hepe sang San Carlos City Police Station, ginpahayag sini nga ang insidente ang natabo matapos ang klase.
Suno diri, may kumosyon nga natabo sa duha ka grupo sang mga estudyante kag naglagsanay ang mga ini tubtob nga naglab-ot sila sa Teachers Village, Barangay 2, masobra isa ka kilometro ang kalayuon gikan sa nasambit nga eskwelahan kun sa diin natabo ang pagpangbuno.
Suno kay Canja, ang biktima ang nag-agom sang pilas sa nawala nga bahin sang iya tiyan kag gilayon nga gindala sa San Carlos City Hospital para sa nagakaigo nga pagbulong.
Sa karun, yara na ini sa maayu nga kahimtangan kag padayon nga ginabulong.
Samtang, ang suspect naman ang nadakpan sa ginpatigayon nga hot pursuit operation sang mga kapulisan.
Na-recover man sang mga otoridad ang patalom nga ginapatihan nga gingamit sa insidente.
Nagapadayon ang imbestigasyon sang San Carlos City Police Station angot sa insidente.
