Ginpahayag sang Department of Social Welfare and Development (DSWD) Negros Island Region (NIR) nga kinahanglan palig-unon ang relasyon sa pamilya para sa ikaayo sang mga kabataan.
Ini kasunod sa natabo nga shooting incident sa Tacloban City kun sa diin lunsay mga menor de edad ang suspect.
Sa interview sang Bombo Radyo kay DSWD NIR Regional Director Erwin Razo, ginpahayag sini nga kinahanglan may polisa nga ma-implementar agud nga mabuligan ang pamilya ilabi na ang ginikanan sa husto nga pagpadako kag pagiya sang ila mga kabataan.
Suno kay Razo, dapat tutokan ang paghatag sang pro-active interventions kag iban pa nga mga resources para sa isa ka pamilya.
Pahayag sini nga indi pa ulihi ang tanan kag may mahimo pa ang bilog nga ahensya sang gobyerno agud malikawan ang kaangay nga insidente.
