Ginapangita sang mga kapulisan ang vigilante nga gintawag nga “Mexican Batman” matapos gina-alegar nagapangdakop sang mga nagapangawat sang motorsiklo kag ginapanghigot ang mga ini sa mga poste gamit ang duct tape.
Isa ka wala pa makilal-an nga persona nga residente sang Lagos de Moreno ang gina-alegar nagdesisyon nga maghimo sang iya kaugalingon nga bersyon sa pagkuha sang hustisya bangud sa pagdamo sang mga nagapangawat sang motorsiklo sa ila pungsod.
Bangud sa pagkadismaya sa pagresponde sang mga lokal nga otoridad, gintarget sang Mexican Batman ang indi magnubo sa lima ka mga ginapatihan kawatan.
Nakita ang lima ka lalaki nga may mga lagob kag mga pilas kag nakahikot sa mga poste gamit ang duct tape.
May mga drawing man ang ila nga mga guya kag lawas.
Pila sa ila ang may nakasulat nga tinaga nga “ratero,” nga nagakahulugan nga kawatan.
Madasig nga naglapat ang mga litrato kag balita sa social media tuhoy sa insidente kun sa diin gintawag sang pila ka mga netizens ang vigilante nga tawo bilang “Mexican Batman”.
Sa pihak sang pagdayaw sang pila ka mga tawo sa ginhimo sini, nagpatigayon sang imbestigasyon ang mga kapulisan agud matumod ang iya nga identity.
Suno kay Juan Pablo Hernández, ang lima ka lalaki ang ginakabig nga biktima samtang nagapadayon ang imbestigasyon.
Ang lima ka mga lalaki ang ginhilway gikan sa pagkahikot sa poste kag gilayon nga ginhatagan sang nagakaigo nga pagbulong.
Sa karun, indi pa klaro kun ang mga ini ang pormal nga gina-imbestigaran ukon ginkasuhan angot sa mga akusasyon sa pagkawat sang motorsiklo.
