Ginkwestyon sang Metro Bacolod Chamber of Commerce and Industry kun ngaa indi mabatyagan sang mga tawo ang kwarta sang Pilipinas kasunod sa pagkilala sang World Bank sa pungsod bilang upper-middle-income country (UMIC).
Sa interview sang Bombo Radyo kay Executive Officer Frank Carbon, ginpahayag sini nga ‘good news’ ang annoucement sang World Bank apang pamangkot sini kun sin-o ang ga-enjoy sang kwarta sang Pilipinas bangud madamo sa gihapon nga ginaatubang nga problema ang Pilipinas.
Ilabi na subong nga yara sa gihapon sa idalom sang State of National Calamity ang pungsod.
Suno kay Carbon, kun ang kwarta ang yara sa mga dalagko nga tawo kaangay sang mga real estate developers kag importers dapat ini ang ipanaog man nila sa mga ordinaryo nga mga pumuluyo
Sunod diri, ang gobyerno lang ang makagiho sa kwarta gani ginahangkat sini nga ang tax ang ibutang sa pagpasanyog sang imprustruktura kag ipaagi sa dugang nga trabaho agud mabatyagan man sang mga tawo ang kwarta sang Pilipinas.
