Gin-athag sang konsehal sa ciudad sang Bacolod nga nabaton na sang Committee on Environment and Ecology kag Committee on Laws, Ordinances, and Good Governance ang proposal nga ibyahe ang basura gikan sa Victorias city kag ihaboy sa Bacolod City.
Sa interview sang Bombo Radyo kay Councilor Wilson Jun Gamboa, wala pa nadiskusyonan ang proposal kag kinahanglan pa ini nga tun-an.
Suno diri, ang basura nga halin sa Victorias city amo ang residual waste ukon ang basura nga indi na mapuslan.
Suno kay Gamboa, gin-aprubahan na sang solid waste management board ang plano pero wala sang public consultation kag iya man nga ginkalipay nga ginbaton ini sang Sangguniang Panlungsod agud mahatagan sang husto nga tion para madiskusyonan.
Nabasahan sini ang approvgal sang solid waste management board kag sa pag-intindi sini ginakabig nga kabahin ang Victorias city sang trustor cities sang Bacolod City.
Para sa iya tuman ka layo nga ibyahe pa ang basura halin sa Victorias City kag nakita man sini nga madamo sang wala nagapabor nga ihaboy pa sa Bacolod City ang basura halin sa iban nga LGU.
Panawagan sini nga mahimo na lang ang LGU sang Victorias city sang ila kaugalingon nga sanitary landfill kag bisan magbayad pa sila, indi man ini sa gihapon makasangkol sa mangin epekto sa ciudad kun madugangan pa gid ang tumpok-tumpok nga basura.
