Pilason ang duha ka driver matapos magbunggu-an sang awto ang pick up sa intersection sang Mabini-Gonzaga Street, Brgy 29, Bacolod City kaina alas-3:20 sang kaagahon.
Ang driver sang Toyota Vios ang ginkilala nga si Chelo Marie Estrada, 47 anyos, single, residente sang Granada Street, Villa Caridad Subd., Brgy 3, La Carlota City, samtang ang driver sang Toyota Hilux ang ginkilala nga si Shalom Cres Rosas, 48 anyos, kasado, residente sang Block 21 Lot 1 Phase 2A 1 sa Dagat Dagatan, Navotas.
Sa interview sang Bombo Radyo Bacolod kay Police Major Elmer Bonilla, head sang Traffic Enforcement Unit sang Bacolod City Police Office, ang awto ang nagabyahe sa east to west direction, samtang ang pickup ang nagabyahe naman sa south to north direction.
Sa intersection sa atubang sang daan nga opisina sang Central Negros Electric Cooperative (CENECO), wala napreparahan ni Rosas ang awto ni Estrada gani ini ang iya nabungguan.
Parehas nga nakaangkon sang damages ang duha ka salakyan, kag ang mga driver ang gindala man sa ospital.
Suno kay Bonilla, minor injuries lamang ang naagom sang duha ka driver, gani sila ang gilayon man nga na-out patient.
Sa inisyal nila nga impormasyon, nagkasugot na ang duha ka driver nga indi na lamang magpasaka sang kaso.
Samtang dutayan lamang malab-ot sang nagbunggu-anay nga salakyan ang katupad nga gasoline station.
Sa interview sang Bombo Radyo Bacolod kay Carlo dela Torre, pump boy nga nakakita sang aksidente, wala sini makita sang nagapadulong ang mga salakyan kag nakibot na lamang ini sang nabatian ang pagsigabong.
Nagapati ini nga parehas madasig ang duha ka salakyan bangod gin-arado gid sang pickup ang awto padulong sa ila gasolinahan.
Suno kay Dela Torre, may mga nagapatughong sa ila sang amo nga oras, gani ginapakamaayo na lamang niya nga wala gid nakalab-ot sa pump station ang duha ka salakyan.
