Ginpahayag sang lead convenor sang Alyansa Kontra Basura nga insulto sa mga Bacolodnon ang pag-aprubar sang Solid Waste Management Board nga ihaboy sang Local Government Unit sang ciudad ang Victorias ang ila basura sa sanitary landfill sa barangay Felisa.
Sa interview sang Bombo Radyo kay Wennie Sancho, disbentaha para sa mga pumuluyo sang Bacolod ang dugang nga basura bangod bisan ang ciudad indi na kasarang sa problema sa basura apang dugangan pa.
Suno diri, ngaa ipalukdo sa Bacolod city ang problema sang iban nga ciudad kun wala sila sang sanitary landfill.
Suno kay Sancho, kun madugangan pa gid ang basura sa ciduad, ini may yara sang konsekwensya nga magaresulta sa mas dako pa gid nga halit kag kun maaprubahan gid man ang tuyo sang Victorias city, ini mahimo nga nagalapas sa kinamatarong sang pumuluyo.
Pahayag ni Sancho, wala respeto kun pahanugotan ang Victorias city nga maghaboy sang basura sa Bacolod city kag nagalaum ini nga kun tani maintindihan sang opisyales sang Bacolod city ang mangin konsekwensya.
