Nagpaandam si Impeachment Trial Presiding Officer Francis “Chiz” Escudero sa depensa kag prosekusyon nga indi sini pagtugutan ang anuman nga “federations” nagikan sa bisan diin nga bahin, sabat man ini ukon pamangkot sang isa ka senator-judge.
Gin-emphasize ni Escudero nga tinutuyo sini nga mahatagan sang kahigayunan ang mga testigo nga ipresentar ang ila nga ebidensya sabaylo nga maghatag ang mga counsel sang ila mga pahayag angot sa facts and law.
Ginhimo ni Escudero ang pahanumdom matapos nga mag-file sang mosyon si Senator-Judge Pia Cayetano kahapon sa ikaduha nga adlaw sang trial nga panason sa rekord ang nangin sabat ni prosecution counsel Atty. Amando Ligutan sa pamangkot ni Senator-Judge Risa Hontiveros, nga mapaanggid sa isa ka closing statement.
Nauna na nga ginpamangkot ni Hontiveros kung paano nangin impeachable offense ang ginpahayag sang Bise Presidente sa video nga nag-contact na ini sang assasin agud nga patyon ang Presidente, First Lady, kag ang Speaker.
Sa ulihi, gin-athag man ni Hontivero nga indi sini intensyon nga maghimo sang closing argument kundi luyag lamang sini nga athagon kung paano gin-categorize sang prosecution ang mga pahayag ni Vice President Sara Duterte.
Gin-athag man ni naman ni Escudero nga wala naman sang pulos bisan nga panason pa ang nangin pahayag sang prosecution bangud nakita na ini sang publiko gani nagdesisyon ang Presiding Officer nga hatagan sang pareho nga kahigayunan ang depensa nga maghatag sang ila nga statement matapos ang ginpatigayon nga cross examination sa una nga testigo nga si National Bureau of Investigation (NBI) senior agent John Mark Calilung.
