Nagalaum si Ma. Lourdes Celina Yanson-Lopez, isa sa “Yanson 4,” nga may anghel nga makatandog sa tagipusuon sang iya iloy nga si Olivia V. Yanson agud matapos na ang ila away nga magpamilya.
Madumduman nga ginkumpirmar ni Atty Norman Golez nga nagpaggwa sang panibag-o nga warrant of arrest batok sa Yanson 4 nga ginlakipan nanday Ma. Lourdes Celina, Roy V. Yanson, Emily V. Yanson, Ricardo V. Yanson Jr. angot sa kaso nga Qualified Theft may kaangtanan sa P803.47 million nga pondo sang Mindanao Star Bus Transport, Inc. (MSBTI) nga gina-alegar gindeposit sa ila mga personal bank accounts sang 2019.
Suno kay Ma. Lourdes Celina, handa sila nga mag-utod nga atubangon ang kaso nga ginpasaka batok sa ila.
Suno sa iya, bukas sila nga makig-ayuhay kag ginpahayag nga makapila na nga beses nila gintinguhaan nga makig-angot sa ila nga iloy apang ginabalabagan sila sang mga tawo nga nakapalibot sini.
Ginpaathag man sini ang alegasyon nga indi nila luyag makig-ayuhay.
Suno diri, sala nga impormasyon ang ginadul-ong sa ila kag ginaguba ang ila nga reputasyon agud mas mapalayo sila sa isa kag isa.
Ginpahayag man ni Celina nga kun buhi pa ang ila amay nga si Ricardo Yanson, indi kuntani maginamo ang ila pamilya.
Suno kay Celina, ginhimo sang ila amay ang tanan nga sakripisyo kag risgo agud mapabilin nga malig-on kag magkahiusa ang pamilya bangud ang iya mga apo kag mga bata ang pinaka-importante sa kabuhi sang ila amay.
Dugang pa sini, patas man ang pagtratar sang ila amay sa ila nga mag-utod, apang ginpahayag sini nga may paborito ang ila iloy halin pa sang una.
