Ginreport sang Philippine National Police (PNP) nga nagpanaug sa 20.6 percent ang crime rate sa Pilipinas sang nakaligad nga tatlo ka bulan humalin sang ginlunsyar ang Safer Cities Initiative.
Suno kay PNP Public Information Office chief Col. Allen Rae Co, apisar sang mga asod-asod naga-viral nga mga krimen subong, ginpamatud-an sang official statistics nga mas luwas ang pungsod subong sangsa mga nakaligad nga bulan.
Humalin sang Abril 6 tubtob Hulyo 4, 2026, nagpanaug sa 7,883 ang nareport nga focus crimes kumpara sa 9,506 nga kaso humalin Enero 6 tubtob Abril 5.
Kalakip sa mga reportted nga pagnubo sa crime rate amo ang carnapping, rape, physical injury, robbery, homicide, theft, kag murder.
Ginpaathag sang PNP nga ang positibo nga trend nga ini ang bunga sang mga tikang kaangay sang Safer Cities Initiative nga may katuyuan nga pasangkaron pa ang seguridad sa mga ciudad, mas ginpabaskog nga police visibility sa mga komunidad, kag pagsaka sa 21.74 percent sa mga nagkaladakpan nga nagalapas sa mga lokal nga layi.
Suno sa kapulisan, ang pagkaaresto sa mga nagalapas sa pagsulondan ang nakabulig agud makontrol ang mga krimen antes pa man ini matabo.
