Padayon nga maeksperyensyahan ang epekto ni Bagyo Kiyapo sa Northern Luzon apisar nga nakagwa na ini sa Philippine Area of Responsibility kaina sang kaagahon.
Ang sentro sang bagyo ang ulihi nasiplatan sa 320 km nakatungdan sang Basco, Batanes nga may kabaskugon sang hangin nga 120 km/h kag pagmadlos nga 150 km/h.
Ini ang nagahulag sa West Northwestward nga direksyon nga may kadasigon nga 25 km/h.
Nagapabilin nga Tropical Cyclone Wind Signal no. 1 anG Batanes, western portion sang Babuyan Islands, northwestern portion sang mainland Cagayan, northern portion sang Apayao, kag Ilocos Norte.
Samtang padayon nga nagaapketo ang Southwest Monsoon ukon hanging habagat sa Central kag Southern Luzon, Visayas, kag Mindanao.
Lauman ang pagbubu sang ulan nga may pagmadlos sang hangin sa Ilocos Norte, Batanes, kag Babuyan Islands tuga sang bagyong Kiyapo.
Maeksperyensyahan naman ang tumalagsahon nga pag-ulan sa Zambales, Bataan, kag Occidental Mindoro, dala sang hangin habagat.
Lauman naman ang lapta-lapta nga pag-ulan sa Cordillera Administrative Region, nabilin nga bahin sang Ilocos Region, kasubong man sa nabilin nga bahin sang Cagayan Valley Region tuga naman sang trough sang bagyo.
Sa Metro Manila, Visayas, nabilin nga bahin sa Luzon, Zamboanga Peninsula, BARMM, Northern Mindanao, kag Caraga, maeksperyensyahan ang lapta-lapta nga pag-ulan dala sang habagat.
Samtang, sa nabilin nga bahin sang Mindanao, lauman ang pugtak-pugtak nga pag-ulan dala gihapon sang hangin habagat.
