Nasapwan nga wala na sang kabuhi ang isa ka lalaki sa kilid sang Binalbagan River, Sitio Palaypay, Barangay Quintin Remo, banwa sang Moises Padilla alas-5:30 kagab-i.
Ang biktima ang ginkilala nga si Hedmark Santillan, 28-anyos, kasado, laborer kag residente sang Sitio Lower Mamballo sa nasambit nga banwa.
Sa interview sang Bombo Radyo kay Police Major Ryan Villasario, hepe sang Moises Padilla Municipal Police Station, santo sa panaysayon sang asawa sang biktima, alas-7:00 sang aga naghalin ang iya bana sa ila balay agud magpangisda sa suba gamit ang improvised electrocution device.
Apang wala na ini nakapuli pa kag ginpahibalo siya ni Ronelo Lopez nga ang iya bana ang nasapwan nga wala na sang kabuhi sa kilid sang suba kagab-i.
Suno kay Villasario, ginalantaw nga nakuryente si Santillan sang electrocution device nga iya gingamit sa pagpangisda.
Wala sang nakita nga pilas ukon injury sa lawas sini.
Wala man sang nakita nga foul play sa pagkamatay ni Santillan.
Sa pihak sini, ginpahayag ni Villasario nga nagrequest sila nga ipaidalom sa post-mortem examination ang bangkay sang biktima agud matumod kun ano gid ang gintunaan sang kamatayon sini.
Padayon pa ang imbestigasyon sang kapulisan angot sa insidente.
