Target sang Department of Budget and Management (DBM) nga isumiter ang P7.2 trillion nga national budget proposal para sa masuod nga tuig, sini nga Agosto 14.
Ang target nga pagsumiter sang National Expenditure Plan (NEP) para sa 2027 ang duha ka semana matapos ang ikalima nga State of the Nation Address (SONA) ni President Ferdinand Marcos Jr. sang Hulyo 27.
Sulod naman sa gintalana sang layi nga 30 days humalin sang buksan ang regular legislative session nga kadungan sang SONA.
Una na nga gintalana sang Development Budget Coordination Committee (DBCC) nga ginapangunahan sang DBM, ang national budget sa masunod nga tuig sa P7.2 trillion ukon may equivalent nga 21.7% sang gross domestic product (GDP) sang pungsod.
Mas mataas naman sang 6 percent ang proposed budget sa 2027 kumpara sa budget sini nga tuig nga P6.793 trillion.
Suno kay Budget Secretary Kim Robert de Leon, naka-focus ang proposed budget sa mga programa, aktibidad kag proyekto nga may katuyuan nga masabat ang mga kinahanglanon sang mga Pilipino, kag masiguro ang mas malig-on kag garantisado nga bwas-damlag para sa tanan.
Isa sa mga challenges sa paghimo sang pondo para sa fiscal year 2027 ang magutok nga fiscal space tuga sang funding pressure sang automatic appropriated items kaangay sang National Tax Allotment para sa mga LGU, interes sa mga utang, mga bag-o nga proyekto, kag mga mandatory nga balayran sang gobyerno.
