Handa na ang Diocese of Bacolod para sa patigayunon nga installation sang bag-o nga Obispo sa Agosto 10 kag 11.
Si Most Rev. Louie Galbines ang magabulos kay Patricio Buzon, D.D. bilang bag-o nga Obispo sang Diocese of Bacolod.
Sa interview sang Bombo Radyo kay Fr Mitch Guadalupe, Vice Chairman sang preparation sang Canonical Installation and Solemn Installation ni Most Rev Galbines, nagpatigayon na sang press conference ang mga kaparian sang Diocese of Bacolod para sa preparasyon sa natalana nga installation.
May patigayunon nga motorcade kag welcoming sa Agosto 10 samtang Agosto 11 naman ang installation.
Alas-8:00 sang aga magaprosisyon ang tanan nga mga kaparian sa Bacolod Public Plaza padulong sa San Sebastian Cathedral.
Sa gab-i naman may patigayunon nga testimonial dinner para sa mga bisita kag iban pa nga obispo.
Suno diri, 39 ka mga obispo gikan sa nagkalain-lain nga lugar kag kapin 200 ka mga kaparian ang magatambong sa selebrasyon.
Pahayag ni Guadalupe, nakigkoordinar na ang Diocese of Bacolod sa mga kapulisan kasubong man sa LTRFB para sa seguridad sang tanan.
Lauman man nga may rerouting sa pila ka mga dalanon sa palibot sang plaza partikular na sa Galo St, Gonzaga St kag San Juan St.
