Pormal na nga nagpungko bilang Obispo sang Diocese of Bacolod si Most Rev. Louie P. Galbines, D.D. matapos nga ginpatigayon ang canonical installation kahapon, Agosto 11.
Sa interview kay Galbines, ginpasalamatan sini ang mainit nga pagbaton sa iya sang mga tumuluo.
Suno diri, tuman ang kalipay sini sa mainit nga pagsugata kag pag-abi abi sang mga tumuluo kag sa bug-os nga komunidad.
Dugang pa sini nga padayunon niya ang mga nasugudan na ni Bishop Emeritus Patricio Buzon ilabi na ang pagpabakod sang spiritual life sang mga katawhan.
Samtang, ginklaro man sini nga wala pa sang matabo nga reshuffling sa mga kaparian bangod luyag niya anay nga tun-an ang matuod nga sitwasyon sang Diocese.
Nagpanawagan man ini sang paghiliusa kag paglaom sa bug-os nga Diocese ilabi na sa mga Bacolodnon.
Ang canonical installation ni Most Rev. Galbines, D.D. ang gintambungan sang 40 ka Obispo, isa ka Diocesa Administrator, duha ka Monsignor nga ginabug-usan sang Secretary kag Counselor sang Papal Nuncio to the Philippines.
Nagdangat naman sa 1500 ka mga tumuluo ang yara sa sulod sang San Sebastian Cathedral samtang 350 naman ang clergy sa ginpatigayon nga canonical installation ceremony.
Nagpabutyag man sang kalipay si Most Rev. Charles Brown, D.D, Papal Nuncio to the Philippines matapos ang mainit nga pag-abi abi sa iya pag-abot sang Lunes, Agosto 10.
Suno kay Brown, ginapalab-ot ni Holy Father Pope Leo IVX ang pagpasalamat kay Most Reverent Patricio Buzon sa napulo ka tuig nga pagserbisyo sini sa Diocese of Bacolod.
