Indi magnubo sa 17 ka tawo ang nautas ang kabuhi samtang 40 naman ang pilason sa pagpang-atake sang Russia sa Kyiv, Ukraine.
Naigo ang pila ka mga apartment building, bodega, mga buluthuan, kag isa ka ospital para sa mga kabataan.
Suno sa alkalde sang Kyiv nga si Mayor Vitali Klitschko, liwat naman nga gintarget sang Russia ang mga kritikal nga imprastraktura sang Kyiv.
Bangud sa pag-atake, linibo ka mga pamalay ang nadulaan sang kuryente kag nagpaandam man ang alkalde nga maapektohan ang suplay sang mainit nga tubig sa pila ka mga distrito.
Nagpanawagan si Klitschko sang dugang nga air defense missiles.
Nagpahayag naman si Ukrainian President Volodymyr Zelensky nga importante ang mga interceptor missile agud maproteksyunan ang mga sibilyan.
Samtang, ginpanindugan naman sang Russia nga mga pasilidad sang militar kag bodega ang target sang ila operasyon.
