May ginasundan na nga suspect ang Bacolod Police Station 6 sa pagpang-holdup sa City Heights, Brgy Taculing, sa ciudad sang Bacolod.
Madumduman nga samtang yara sa ila gate ang babayi nga biktima, may naglabay nga duha ka lalaki nga sakay sang motorsiklo kag gintayaan siya sang patalom.
May yara ini sang dala nga bag apang ang cellphone lang ang natigayon nga makuha sang mga suspect.
Ang biktima ang ginkilala nga si alays “Rheamae’ nga isa ka call center agent.
Sa interview sang Bombo Radyo kay Police Major Peter John Ramos, Officer in Charge sang Bacolod Police Station 6, ginpahayag sini nga ang nakuha nga iphone sang mga suspect sa biktima ang nagabalor sang P30,000.
Suno kay Ramos, posible nga indi planado ang pagpanghold up kag ang biktima ang nalabyan lang sang mga suspect gani ila ginkuha ang kahigayunan nga ihold up ini.
Mensahe sini sa mga pumuluyo nga mangin vigilante sa palibot kag gilayon nga magtawag sa emergency hotline 911 inkaso may emerhensya nga maeksperyensyahan.
Sa pihak nga bahin, may natabo man nga attempted robbery sa isa ka balay sa Brgy Tangub, Bacolod City.
Makita sa CCTV footage ang duha ka mga lalaki nga plano kuntani masulod sa balay sang biktima.
Nagapanilag ang mga ini kun may tawo sa palibot kag nagapalapit sa gate.
Gintaghol pa ang mga ini sa ido, apang gilayon sila nga nagpalagyo matapos makabugtaw ang tag-iya sang balay.
