Padayun lamang ang hugot nga mga security measures sa mga eskwelahan apisar sa pagkanselar ni Education Secretary Sonny Angara sa natalana kuntani nga Nationwide Simultaneous School Safety Drill for Active Attack Incidents sang Department of Education (DepEd) subong nga adlaw, Agusto 25.
Sa interview sang Bombo Radyo Bacolod kay DepEd Negros Island Region Spokesperson Almyr Ceazar Dequinia, sa pihak sang kanselasyon sang Active Shooter Drill, padayun gihapon ang mga inisyatibo sa tagsa ka buluthuan sa mas hugot nga safety measures.
Suno kay Dequinia, sa mga natabo na nga school shootings sila ang naga-upod sa kalisod sang pamilya sang biktima.
Ini ang rasun man kun ngaa indi pwede nga mangin complacent ang eskwelahan.
Pahanumdom sini sa mga DepEd Division Offices nga seguruhon nga ang mga eskwelahan ang may koordinasyon sa local government units (LGUs) kag sa law enforcement agencies.
Suno diri, ang pag-address sa school violence ang nagakinahanglan sang whole of community approach.
Angot naman sa nagakabatun nga school threat, ginaseguro sini nga ginakonsiderar nila nga seryoso ang mga pagpamahog.
Samtang, panawagan naman sini sa ginikanan nga estoryahon ang mga kabataan kag indi lamang ang academic performance ang hibaluon, kasubong man ang psychological status sang mga kabataan.
