Hugot nga ginpanindugan ni Councilor Jude Thadeus “Thaddy” Sayson ang pagpamatok sa extension sang termino sang mga Barangay officials.
Ini sa pihak sang pagduso sang Senado kag Kamara nga mapostpone ang Barangay and Sangguniang Kabataan Elections sa Nobyembre 2, 2026, kag patigayunon na lamang sa 2028.
Sa interview sang Bombo Radyo Bacolod kay Sayson, overstaying na ang mga Barangay officials kun makaduha na nga ma-extend.
Panindugan sini nga nakagasto na ang Commission on Election para sa November 2 Elections kag ini ang mauyang lamang kun indi padayunon.
Wala naman ini sang problema kun magdesisyon sila nga palawigon sang lima ka tuig ang termino apang dapat matapos na sang eleksyon.
Suno diri tuman na ka lawig ang pagpamuno sang opisyal kun ipostpone ang eleksyon, kag ini ang dugang nga pag-antos para sa mga pumuluyo nga nagtupa sa ulugtasan nga Barangay officials.
Pahanumdom sini nga ang karun nga mga Punong Barangay, amo gihapon ang mga Punong Barangay sa tion sang pandemic, nga ang iban na-issuehan bangod sa mga hatagay sang ayuda nga ang “lapit kay kap” lamang ang makabatun.
Ginakatingala ni Councilor Jude Thadeus “Thaddy” Sayson kun ano ang ginakakulbaan sang mga Senador kag Kongresista kag ginaduso gid nga mapostpone ang Barangay and Sangguniang Kabataan Elections.
Suno diri, ang mga national officials ang may malawig paman nga tion antes ang 2028 Elections.
Indi man ini kumbinsido sa rasun sang mga opisyal nga ipostpone ang eleksyon bangod sa krisis.
Panindugan niya nga ang matuod-tuod nga krisis amo ang mga pumuluyo nga naga-antos sa indi husto nga pagpamuno sang ila Barangay officials, nga plano pa nga palawigon.
Suno kay Sayson, kun may krisis naman nga pangatubangon ang pungsod sa 2028, mahimo nga amo gihapon ang irasun para sa liwat nga postponement.
Dugang pa sini nga ang magastos sa eleksyon ang mabawi man sang mga Senador kag Kongresista bisan paagi sa isa lamang ka contractor sang flood control project.
Panindugan ni Sayson nga kun maayo ang pagpamuno sang Brgy official, sila ang indi mahadlok sa eleksyon bangod bisan indi pa magpangampanya, sila gihapon ang botohon sang pumuluyo.
Dugang pa sini nga ang matuod-tuod nga Punong Barangay nga para sa pumuluyo, sila na mismo ang magapangindi sa extension, bangod bisan ang ila kaugalingon nga kwarta ang ibulig pa nila sa pumuluyo.
Pahanumdom pa sini nga nakapagwa na sang ruling ang Korte Suprema nga nagadumili sa postponement, kag kun ini ang indi gihapon sundon, kaangay nga wala na sang nagataha kag nagapati sa layi.
