Ginsapol sang Bacolod City Legal Office sa pagpanguna ni Atty Reuben Sabig ang City Legal Enforcement Team nga ginapamunuan ni Atty Bartolome Malde agud ipahanumdom ang pag-exercise sang maximum tolerance sa pagpatuman sang road clearing operations.
Ini kasunod sang duha ka asod-asod nga insidente sang pagbina-isay sa tunga sang enforcement team kag ang ginaclearing nga mga vendors.
Ini ang ginalakipan sang person with disability (PWD) nga makapila na ka beses nga ginsaway sa paglatag sang iya baligya sa side walk apang wala nagapamati.
Kasubong man ang natabo nga pagpang-ula sang enforcer sang mga baligya sang isa pa ka vendor, nga ginpanglapakan pa.
Suno kay Atty Reuben Sabig, indi dapat makipag-close ukon mangin malapit nga abyan sa mga nagapasaway nga vendors.
Ini bangod sila ang mabudlayan sa pagpatuman sang ila nga responsibilidad sa pagsaway kag pagpahalin sang mga ini sa dalan.
Apang sa pihak sini, indi man dapat magpasobra kag maghatag gid sang limitasyon.
Pahanumdom sini nga ang indi maayo nga pagtratar kaangay sang pagbuyayaw, pisikal nga pagsakit sa mga vendors, kag pagguba sa ila produkto ang mahimo makatuga pa sang kinagamo kag mabalik sa ila.
Samtang pahayag naman ni Malde nga nahangpan nila nga emosyonal ang mga apektado nga vendors, apang ila nga mandato nga ipatuman ang layi gani ini ang dapat tindugan.
Sa pihak sini dapat man nga maghalong sa hulag kag ipabilin ang maximum tolerance, kag indi magbuya sang mga indi na nagakaigo nga tinaga apisar nga salawayon ang pila ka mga vendors.
