Plano sang Land Transportation Office Negros Island Region nga magpatigayon sang night operations sa pagpanakop sang tuman ka gahod nga mga tambutso sang motorsiklo sa ciudad sang Bacolod.
Ini ang kabahin sa tikang sang LTO NIR nahanungod sa reklamo sang mga pumuluyo partikular na sa Brgy Estefania kag Brgy Granada sa mga magahod nga tambutso ilabi na kun magab-i.
Sa interview sang Bombo Radyo Bacolod kay LTO-NIR Assistant Regional Director Monico A. Puentevella Jr., ginpahayag sini nga ginasiguro anay nila nga kompleto sila sang kagamitan antes magpatigayon sang nasambit nga operasyon agud malikawan ang risgo sa mga enforcers.
Suno kay Puentevella, indi man sila maka-issue sang show cause kun wala sang kagamitan nga mangin basehan sa pagtakos sang decibel level sang mga open pipe kag modified mufflers.
Ini agud mapamatud-an nga naglapas sa ginapatuman nga sound level ang isa ka motorsiklo.
Nagahingyo ini sa mga brgy officials kag pumuluyo nga gilayon ireport ukon magpadala sang video sang plaka sa mga motorsiklo nga may tuman ka gahod nga tambutso agud marespondehan.
Sa karun, suno kay Puentevella, ginahulat pa sang ahensya ang opisyal nga sound level measurement equipment halin sa LTO Central Office antes magpatuman sang mas istrikto nga pagpanakop.
