May yara na sang officer in charge ang anum ka mga police stations sa Negros Oriental matapos nga gin-relieve kasunod sang one strike policy kaupod ang provincial director sang Negros Oriental Police Provincial Office (NorPPO).
Sa interview sang Bombo Radyo Bacolod kay Police Regional Office-Negros Island Region (PRO-NIR) spokesperson Police Lt. Col. Joem Malong, ginkumpirmar sini ang pag-relieve sa anum ka hepe kag sang provincial director sang NOrPPO sa idalom sang one strike policy batok sa illegal gambling kag iban pa nga illegal nga buluhaton.
Suno kay Malong, ang anum ka police station ang may yara na sang bag-o nga officer-in-charge.
Ini ang ginlakipan nanday Police Lt Col. Roneol Gragasin Fungo nagbulos kay Police Lt Col. Joeson Parallag bilang Officer in Charge sang Bayawan City Police Station; Police Lt Col. Nerito Sedilles Lobrido nagbulos kay PLt Col. Romeo Cubo bilang Officer in Charge sa Guihulngan City Police Station; Police Maj. Antonio Quiampao De Leon Jr nagbulos kay Police Maj. Mary Jean Guiterrez bilang Officer in Charge sang Sibulan Municipal Police Station; Police Captain Roldan Ingo Marana nga nagbulos kay Police Captain James Taylor Pineda bilang Officer in Charge sang Pamplona Municipal Police Station; Police Captain Cecile Jakosalem Mingay nga nagbulos kay Police Captain Arturo Marfil III bilang Officer in Charge sang Tayasan Municipal Police Station kag Police Captain Berwyn Benitez Soreño nga nagbulos kay Police Captain. Joesanne Magalso bilang Officer in Chare sang Ayungon Municipal Police Station.
Samtang suno kay Malong, ginahulat pa kun sin-o ang ibutang nga Provincial Director sang NorPPO pang ang OIC amo si Police Col Lito Patay.
Dugang pa sini nga ang strike policy ang madugay na nga polisa sang Philippine National Police.
Ang mga na-relieve nga hepe kag provincial director ang yara sa karun sa NOrPPO headquarters para sa imbestigasyon kag mangatubang sang kaso kun mapatud-an nga may kakulangan sa ila katungdanan.
