Patay ang isa ka 43-anyos nga lalaki nga subject sang igaserbe nga search warrant matapos gin-alegar nga nagbato sa mga kapulisan sa Sitio Tuko, Barangay Inolingan, Moises Padilla, Negros Occidental, kaina sang kaagahon, Agosto 30, 2026.
Ang biktima ginkilala kay alyas Reynan, 43 anyos, kasado, lalaki, isa ka laborer kag residente sang amo nga lugar.
Sa interview sang Bombo Radyo Bacolod kay Police Major Ryan P. Villasario, Chief of Police sang Moises Padilla Municipal Police Station, kahapon sang kaagahon ila nga ginpatuman ang Search Warrant Number 2026-323 para sa paglapas sang Republic Act Number 10591 ukon Comprehensive Firearms and Ammunition Regulation Act sa nasambit nga lugar.
Suno kay Villasario, sang ang operating team ang magaserbe na sang search warrant ang suspek ang hinali lang nga nagpalupok sang iya armas-luthang sa dereksyon sang mga kapulisan.
Bilang depensa, nagbalos sa pagpalupok ang mga operating personnel, nga nagresulta sa pagkasamad sang subject person nga nangin tunaan man sang kamatayon sini.
Narekober sang mga otoridad ang isa ka caliber 12-gauge shotgun, isa ka 12-gauge ammunition, kag isa ka caliber .45 Colt pistol.
Nagpangayo naman ang kapulisan sang bulig sa Scene of the Crime Operatives ukon SOCO sa pagproseso sang crime scene, samtang nagresponde man ang mga personnel sang Moises Padilla Municipal Disaster Risk Reduction and Management Office sa lugar.
Ginpatuman ang search warrant bangud sa mga reklamo sang mga pumuluyo nga nagapalupok ini sang armas luthang ang subject person kada tungang gab-i.
Ang subject person ang nakuhaan man sang iligal nga druga kag may kaso man sadto paglapas sa RA 9165 ukon Comprehensive Dangerous Drugs Act of 2002.
