Wala na sang kabuhi ang isa ka 53 anyos nga tricycle driver matapos masapwan nga naga-utaw-utaw sa pangpang sang Sum-ag River sa Purok Talutog, Barangay Dulao, Bago City, Negros Occidental, alas-8:00 sang aga, Agosto 30, 2026.
Ang biktima ginkilala sa alyas nga Joel, 53 anyos, balo, tricycle driver, kag residente sang nasambit nga lugar.
Sa interview sang Bombo Radyo Bacolod kay Police Master Sergeant Magno Pahayupan Jr, Investigator on Case sang Bago City Police Station, suno kay Joemarie Rosal, anak sang biktima, alas-6:00 sang gab-i sang Agosto 28, 2026, nagainom sang makahulubog nga ilimnon ang iya amay upod kay Johnrey Alberta sa ila puluy-an matapos nga nagdul-ong ini sang uling sa Barangay Sum-ag, Bacolod City.
Nag-una pauli si Alberta apang ginalantaw nga alas 9:00 ang takna sang gab-i naghalin ang biktima sa ila balay kag nagtabok sa Sum-ag River.
Sang Agosto 29, ginpangita ini sang iya nga mga kabataan matapos nga wala ini nakapauli sa ila balay.
Alas 8:00 ang takna kahapon sang aga, Agosto 30, nakita ni RJ Rosal ang lawas sang ila amay nga nagalutaw na sa pangpang sang suba.
Ginpahayag sang mga bata sang biktima nga ila amay ang nagagwa kun makulang sa gin-inom nga makahulubog nga ilimnon kag ang mabudlay lamang wala sang ginatabukan nga taytay gani maagi gid sa suba.
Ginalantaw nga nakadanlog ang biktima kag nahulog sa suba.
Una naman nga nabatyagan sang bata sang biktima nga mahimo nalumos sa suba ang ila amay.
Nagapati naman ang pamilya sang biktima nga aksidente ang natabo kag wala sang foul play.
