May ara na sang person of interest ang Toboso Municipal Police Station sa nagbilin sang lapsag sa Sitio Maaswa, Barangay General Luna, banwa sang Toboso.
Madumduman nga nasapwan sang isa ka concerned citizen nga wala na sang kabuhi ang lapsag nga ginsulod sa sako malapit sa ila balay sang Huwebes.
Sa interview sang Bombo Radyo Bacolod kay NOCPPO Spokesperson Police Major Judeses Catalogo, yara karun sa Municipal Social Welfare and Development Office sa nasambit nga banwa ang ila ginakonsiderar nga person of interest.
Ini samtang ginhulat pa nila ang resulta sang postmortem examination sa pagtumod sa gintunaaan sang kamatayon sang lapsag.
Suno kay Catalogo, may yara naman sila sang witness nga makabulig sa ila imbestigasyon.
Pahayag sini, posible nga magapangatubang sang kaso nga infanticide ang mga suspetsado.
Padayon pa ang ila imbestigasyon sa pagtumod sa ginikanan sang lapsag.
