Pabor ang Presidente sang Alliance of Concerned Consumers in Electricity and Social Services (ACCESS) sa Comprehensive Energy Reform nga ginapanawagan ni Rev Fr Gerardo Alminaza, Bishop sa Diocese of San Carlos.
Ini may kaangtanan sa halos adlaw-adlaw na nga rotational brownout sa idalom sang Visayas Grid.
Sa interview sang Bombo Radyo Bacolod kay ACCESS President Wennie Sancho, nagapati ini nga nahadlok ang Department of Energy (DOE) kag Energy Regulatory Commission (ERC) sa National Grid Corporation of the Philippines (NGCP).
Ini bangod 40 porsyento kag ang pinaka-importante nga mekanismo kag programa sang NGCP ang gina-operar sang Chinese engineers.
Ginakahangawa sini nga kun maglala ang issue sang West Philippine Sea, yara sa kamot sang Chinese ang power industry sang Pilipinas.
Panawagan sang Task Force Power Watch – Negros Island Region nga irepel ang Republic Act 9511 kag ibalik ang 90 percent sang operasyon sang NGCP sa mga Pilipino.
Panindugan ni Sancho nga ang isyu ang indi na pwede nga hipsan lamang.
Aminado man ini nga ang pagkapot sang Chinese sa dako nga porsyento sang share sang NGCP ang resulta na sang Republic Act No. 9136 ukon Electric Power Industry Reform Act of 2001 nga mas nakilala bilang EPIRA Law, nga nagpahanugot sa privatization sang mga government-owned and controlled corporation (GOCC).
Pahayag ni Sancho nga 50 ka tuig ang prangkisa sang NGCP, nga nagakahulugan nga amo man ka lawig ang mangin pag-antos sang mga Pilipino.
Suno diri, dapat ma-restructure ini para mahatag ang panginahanglanon nga power supply sang mga pumuluyo.
Pahanumdom ni Sancho nga kadam-an sa mga pumuluyo ang pigado, wala sang kwarta, wala sang pangbakal sang nagapanguna nga panginahanglanon, gani indi na dapat nga dugangan pagid ang pag-antos sa dugay-dugay nga pagkadula sang power supply.
