Suportado sang Sangguniang Panlungsod sa Bacolod ang pagfile ni Bacolod City Lone District Alfredo “Albee” Benitez sang House Resolution nga nagapanawagan sang congressional inquiry angot sa nagakaeksperyensyahan nga power outage sa Visayas.
Nahibaluan nga nagfile sang resolution si Benitez nga nagahingyo sa House Committee on Visayas Development nga mag-imbestigar sa padayon nga power outage sa Visayas Grid.
Suno sa konsehal, importante ang amo nga resolution agud makapatawag sang hearing sa Kongreso kag madiskusyunan kun paano masolbar ang power crisis sa Visayas.
Suno kay Distrito, kinahanglan makasabat ang Department of Energy (DOE), National Grid Corporation of the Philippines (NGCP) kag iban pa nga ahensya sang gobyerno sa problema sang kakulangan sang suplay sang kuryente sa Bacolod kag sa bilog nga Visayas
Pahayag sini, bangud sa yellow kag red alert status, nagakatabo ang rotational brownout nga suno saiya, nagahatag sang daku nga epekto sa mga pumuluyo kag negosyo.
Lakip na diri ang mga mga kagamitan nga nagakaguba bangud sa sige-sige nga brownout.
Pahayag ni Distrito, dapat may ara sang short, medium kag long-term plan nga himuon lakip na ang pagdugang sang generation capacity kag pagpangita sang dugang nga source sang kuryente.
Kinahanglan man, suno sa iya, ang battery energy storage kag pagpadala sang dalagko nga generator agud bisan papaano makasurvive ang mga importante nga pasilidad sa tion sang brownout.
Dugang pa sini, dapat kay-uhon man ang mga renewable energy projects kag infrastructure.
Ginpanawagan sang konsehal sa mga ahensya sang gobyerno nga maghatag sang gilayon nag solusyon angot sini, bangud suno diri, kinahanglan sang sabat sang mga pumuluyo nga naga-antos sa kulang supply sang kuryente.
