Gin-utod sang makadali sang Senate Impeachment Court ang official livestreaming sang impeachment trial ni Vice President Sara Duterte matapos magkahangawa ang testigo nga si Bureau of Internal Revenue (BIR) Chief of Staff Atty. Anne Loraine Garcia-Marquez angot sa privacy sang pila ka opisyal sang ahensya.
Ini matapos mapakita kag maflash sa mga monitor kag screen sang impeachment court ang mga sensitibo nga personal nga detalye sang mga revenue officer kag examiner sang BIR nga naga-uyat sang mga dokumento kag imbestigasyon.
Bangod sini, gilayon nga ginmando sang impeachment court ang pagpa-utod sang broadcast agud matsekyar kag maproseso ang pagtago ukon pagredact sa mga pribado nga impormasyon santo sa Data Privacy Act kag mga probisyon sang Tax Code angot sa confidentiality.
Ini ang ikaduha nga adlaw sang pagtestigo ni Marquez sa Article 2 ukon unexplained wealth, tuhoy sa mga income tax return (ITR) ni VP Sara kag sa iya bana nga si Atty. Manases “Mans” Carpio.
Ginpadayun sang Senado ang trial samtang ginakay-o ang security kag mga ginapakita nga electronic exhibit agud maseguro nga wala nagakalapas ang kinamatarong sa data privacy sang mga public officials samtang nagapadayun ang public trial.
