Preparado na ang mga Barangay kag eskwelahan nga magapartisipar sa highlight events sang Masskara Festival 2026.
Ini unahan sang Electric Masskara 2026 bwas Oktubre 16, nga pasakupan sang pito ka Barangay nga lakipan sang Brgy 12, 14, 17, 19, 21, Villamonte, kag Tangub.
Ang float parade ang magasugod sa Uppereast Megaworld padulong sa Bacolod City Government Center, kun sa diin naman patigayunon ang pagperform sang mga dancers.
Samtang sa Oktubre 17, magaperform naman sa School Category sang Masskara Street Dance and Arena Competition ang pito ka elementary, kag apat sa secondary schools.
Sa elementary category, nalakip ang Sum-ag Elementary School, Education and Training Center School II (ETCS 2), Handumanan Elementary School 1, Vista Alegre Elementary School, Mandalagan Elementary School, Vista Alegre – Granada Relocation Elementary School, kag Montivesta Elementary School.
Samtang sa Secondary category, kabahin naman ang Abkasa National High School, Jovito H Sayson National High School, Bacolod City National High School, kag Progreso Village National High School.
Samtang sa Oktubre 18, magacompete naman sa Barangay category sang Masskara Street Dance and Arena Competition ang walo ka Barangay nga ginalakipan sang Barangay Bata, Alangilan, Brgy 10, Handumanan, Brgy 13, Brgy 6, Taculing, kag Mandalagan.
Sa Masskara Street Dance and Arena Competition, P350,00 ang nagahulat nga premyo para sa champion, P200,000 sa 1st runners up, kag P150,000 sa 2nd runners up.
Antes paman, ginhatagan na ang mga participating schools kag barangay sang subsidy nga magamit sa preparasyon nga ginalakipan sang P750,000 sa kada Barangay, P500,000 sa eskwelahan, kag P300,000 sa mga magapasakop sa Electric Masskara.
