Patay ang barker nga nangagaw sang armas-luthang kag naniro sang gwardiya sa Mansilingan-Murcia Road, Brgy Mansilingan, Bacolod City, matapos ini ang nagbato sa kapulisan.
Ang barker ang ginkilala nga si alyas Toto Trabungco, samtang napilasan man ang gwardiya nga si Aljohn Valero, 35-anyos, residente sang Prk Kawayanan, Brgy Mailum, Bago City.
Ang pagpangagaw sang service firearm sang security guard nga naga-duty sa Open Market Building ang natabo pasado alas-10:00 kagab-i, kun sa diin may nagluntad pa nga pagpukutay sa tunga sang barker kag gwardiya, tubtob nga naagaw gid sang suspect ang armas kag gina-alegar tatlo ka beses nga ginpalukpan ang gwardiya.
Sa interview sang Bombo Radyo Bacolod kay Police Captain JR Reyes, Officer in charge sang Bacolod Police Station 7, sa ila pagresponde sila ang ginpalukpan man sang suspek.
Gani nagbalos sang pagpalupok ang mga kapulisan, nga nagresulta sa pag-agom sang mga samad sang suspek.
Narekober sa suspek ang isa ka loaded 9mm pistol.
Ang barker ang gindala sa Bacolod Adventist Medical Center para sa nagakaigo nga pagbulong apang ini ang ginbawian sang kabuhi.
Ang gwardiya ang nakaangkon naman sang non-fatal injuries nga gilayon man nadapatan sang first aid.
Sa inisyal nga imbestigasyon sang mga otoridad, ang barker ang ginapatihan high sa ilegal nga droga.
