Ginapatihan sang mga nakakita ukon nakasugilanon sa barker nga nagpangagaw sang armas-luthang sa gwardiya kag gintiro-patay sang kapulisan matapos magbato, nga ini ang high sa illegal nga droga.
Sa interview sang Bombo Radyo Bacolod kay Alvin, nakawitness sa natabo nga shooting incident sa Mansilingan-Murcia Road, Brgy Mansilingan, Bacolod City, ginalantaw sini nga nakagamit sang illegal nga droga ang barker nga si Alyas Toto Trabungco antes sini ginpalapitan kag gin-agaw ang service firearms ni Aljohn Valero, 35 anyos, gwardiya sa Open Market Building sang isa ka mall.
Sila ang nagpukutay pa gani nagkalagisi ang delargo sang gwardiya, kag ini ang ginpalukpan sang suspect sang tatlo ka beses.
Pag-abot sang kapulisan, ginhaylo man ini nga ihaboy ang armas.
Apang sa baylo nga magpati ginpalukpan man sini ang kapulisan, gani nagbalos na ang mga ini kag napatay ang suspect.
Samtang kaangay man nga nakagamit sang illegal nga droga ang paglaragway sang gwardiya sang subdivision sa suspect.
Sa interview sang Bombo Radyo Bacolod kay Julie Canoy, security guard sa Carmenville Subdivision, ang suspect ang nagtuyo man nga magsulod sa ila subdivision nakaligad nga adlaw.
Suno diri, nagaduroy lamang ang barker sa pagsulod, apang ini ang iya ginbalabagan kag ginpamangkot.
Wala naman nakasabat ang barker kag nagtangla-tangla lamang sa kahawaan, gani ini ang iya ginpaandaman nga indi pwede magsulod sa lugar.
Naghalin man ini sa area nga kaangay nga akig, apang dugay-dugay ini ang nagbalik.
Kun sa diin ginpahog na lamang niya ang barker nga siya ang magatawag sang pulis kun indi pa ini maghalin.
Kasunod nga adlaw, didto na sini nabalitaan nga ginluthang-patay ang barker matapos magpangangaw sang armas kag magbato sa kapulisan.
Pahayag sini nga nakuhaan sang CCTV ang nasambit nga insidente.
Apang luwas sa iya, pahayag sang iya upod nga gwardiya nga nagkalalisay naman sini sang nakaligad ang barker.
