Tuman ang kalipay sang Punong Barangay sang Brgy Taculing, Bacolod City matapos liwat nga makuha sang ila Barangay ang kampeonato sa Masskara Street Dance and Arena Competition makaligad sang 16 ka tuig.
Sa interview sang Bombo Radyo Bacolod kay Punong Barangay Lady Glez Gonzales Pallen, dako nga bagay para sa iya nga mabalik sa Brgy Taculing ang Masskara championship sa idalom sang iya liderato.
Nagpauli ang mga ini sang P1 million bilang champion, nga gindugangan pa sang tig-P150,000 sa pagdaog sang tatlo ka Special Awards nga ginalakipan sang Best in Theme and Concept, Best in Music, kag Best in Introduction.
Dako naman ang pagpasalamat sini sa mga nagsuporta sa ila bangod dako nga bahin sang budget nga gingamit sa preparasyon ang gikan sa sponsors.
Pahayag ni Pallen nga nagdangat sa kapin P3 million ang ila nga nagastos.
Luwas sa P750,000 nga financial subsidy gikan sa Bacolod City Government, nagpagwa man sang masobra P200,000 ang Barangay, samtang ang nabilin ang gikan na sa mga sponsors nga nagsuporta kag nagsalig sa ila.
Dako ang pagpasalamat sang choreographer kag artistic director sa Masskara Dancers sang Barangay Taculing sa effort sang mga dancers kag props men, nga nagresulta sa pagkuha nila sang kampeonato sa Masskara Street Dance and Arena Competition.
Sa interview sang Bombo Radyo Bacolod kay Romnick Rafael, choreographer sang Brgy Taculing, ang mga partisipante ang nagsakripisyo sa pagsulay sa ulan kag init sa ila pagperform, samtang antes sini masami man kulang ang ila tulog bangod nagaka-agahan na sa practice.
Ini ang nagapakita sa hugot nga loyalty sang mga Masskara dancers sang Brgy Taculing, nga nagpreparar gid sang husto agud mapakita ang matuod nga yuhom kag gugma sang Bacolodnon.
Samtang, una naman nga ginapasalamatan ni Mark Philip Lamirez, Artistic Director sang Brgy Taculing, ang pag-ubay sang Ginoo.
Kun sa diin wala sini ginpatumbayaan ang mga dancers kag props men, halin sa practice tubtob sa final performance.
Ginapasalamatan man nila ang tanan nga nagpangamuyo kag wala untat nga nagsuporta sa ila.
Tuman man ang kalipay sang 16 anyos nga amo ang pinaka-lamharon sa mga Masskara dancers sang Brgy Taculing nga siya ang nakaupod sa grupo nga nangin kampeon.
Sa interview sang Bombo Radyo Bacolod kay Ivan Maverick Dimsun, makapila ka beses naman siya nga nagpartisipar sa Masskara Festival, gani dako ang iya kalipay nga sa iya edad ini ang kaupod na sa ginakilala nga champions.
Bisan natapos na ang awarding, sa pag-atubang sa Bombo News Team, aminado si Dimsun nga wala gihapon nadula ang iya energy nga balon sini bisan sa pagsulay sa init kag ulan.
Pasalig man niya nga sila ang bastante sa vitamins, apang aminado ini nga makapoy ang pagsuksok sang maskara nga may dako nga headress sa malawig nga tion.
