Patay ang isa ka babayi samtang pilason naman ang iya live-in partner nga lalaki matapos ginbuno sang ex-live in partner sa Hacienda Bayabas 3, Brgy Daga, Cadiz City alas-6:50 sang gab-i sang Oktubre 16.
Ang ginbawian sang kabuhi nga babayi ang ginkilala nga si Daniela Marie Jacusalem, 25 anyos, residente sang Prk Active, Brgy Mandalagan, Bacolod City; samtang pilason naman si John Alezura, 34 anyos, residente sa lugar kun sa diin natabo ang pagpamuno.
Ang suspect ang ginkilala naman nga si Hernanie Cueva, 41 anyos, residente sa amo man nga lugar.
Gilayon man nga naaresto ang suspect matapos sang krimen.
Sa interview sang Bombo Radyo Bacolod kay Police Lt Mansueto De Jose, deputy chief of police sang Cadiz City Police Station, ang suspect kag mga biktima ang parehas nga nagapuyo sa isa ka lugar, samtang ang duha ka lalaki ang mag-kumparehay man.
Suno diri, may duha ka bata ang babayi kag suspect apang sila ang indi kasal.
Sa imbestigasyon, natumod nga angkasanay ang duha ka biktima apang sila ang nagdulog sa area, nga gilayon man nga ginpalapitan sang suspect.
Ginabawi sang suspect ang cellphone sang babayi nga gina-alegar sini nga gikan sa iya, samtang nagbalibad naman ang babayi sa panindugan nga siya ang nagabayad sang bulanan sang cellphone.
Didto na nangakig ang suspect kag ginlampusan sang kawayan ang iya ex, nga ginpasundan sini sang pagbuno gamit ang kutsilyo.
Ginbomba man ni Alezura ang iya motorsiklo kag hana nga padalaganon, apang siya ang sunod nga ginbuno ni Cueva.
Wala pa ini nakontento kag bulos-bulos nga ginbuno ang duha ka biktima.
Ginbawian sang kabuhi ang babayi, samtang sa karun padayun naman nga ginabulong ang iya bag-o nga live-in partner.
Luwas sa ginabawi nga cellphone, ginalantaw ni De Jose nga may kaangtanan man sa selos ang pagpatay.
