Gin-athag sang spokesperson ni House Deputy Speaker kag Bacolod City Lone District Representative Alfredo “Albee” Benitez nga ang luyag sang kongresista amo ang transparency may kaangtanan sa Development Bank of the Philippines (DBP) loan sang Bacolod City Government sang ini ang alkalde pa.
Sa interview sang Bombo Radyo Bacolod kay Atty. Caesar Distrito, wala sang ginatago ang kongresista gani may yara na ini sang mga nakahanda nga dokyumento agud nga ipresentar sa mga tawo agud nga makita kun sa diin nagkadto ang loan.
Suno kay Distrito iplastar man ini kuntani sang anay alkalde paagi sa press conference sa isa ka hotel sa ciudad sang Bacolod para sa transparency.
Apang suno diri, may mga kaupdanan ini sa Team Asenso nga nagpugong bangud luyag nga ini ang ipresentar sa Sangguniang Panlungsod agud nga mangin opisyal, kag may yara sang nagfile sang resolusyon agud nga pangayuon ang mga dokyumento nga may kahilabtanan sa proyekto kun sa diin gingamit ang loan sang Bacolod City Government.
Bangud sini nagluntad ang konplikto sa tunga sang kongresista kag ni Bacolod City Councilor Homer Bais.
Gin-athag man ni Distrito nga ang paghampak ni Benitez kag Bais sang lamesa ang bangud lamang sa ila mataas nga emosyon ukon emotional outburst.
Samtang ginpahayag man sini nga may nagbag-o na sa relasyon sang duha apang tion nalang makahibalo kun magauliay pa ang mga ini.
Dugang pa sini nga ginpahayag man sang kongresista nga wala sang malain sa pagdemanda sang transparency.
Ang ginakahangaw-an sini nga nangin political grandstanding, nga nagtuga sang impression nga ang isa ka persona ang nagapakigbato para sa transparency samtang ang mga kaupdanan sini ang ginapunggan ang impormasyon.
Daw kaangay man nga ginbalewala ang mga gin-ubra, kag gindudahan ang integridad sang kaangay nga public servants nga parehas committed sa transparency.
