Gintindugan ni Bayan Muna Chairperson Atty Neri Colmenares nga ang unprogrammed funds sang mga nagliligad nga tinuig ang wala na nagaserbe sang nagakadapat nga purpose bilang standby funds.
Sa interview sang Bombo Radyo Bacolod kay Colmenares, ginbatikos na nila sadto ang 2019 budget matapos nga ang unprogrammed funds ang gingamit sa bulan pa lamang sang Marso.
Ini ang kwestyonable bangod nagadungan na sa mga regular budget.
Kasubong man ang natabo sa 2020, 2021, kag 2022 budget, apang mas nangin malala sang 2023 bangod may unprogrammed funds nga gingamit sa bulan palang sang Enero.
Suno diri ang unprogrammed funds ang dapat standby funds kag ginagamit lamang sa mga programa nga kinahanglan ipatuman apang wala nalakip sa regular budget.
Ini ang masami ginagamit kun wala na sang makuhaan sang pondo, gani sadto ginagastos lamang kun manugtakop na ang tuig.
Apang sa nasambit nga mga tinuig, maathag nga nakaplano na ang mga programa nga pagagamitan, gani ang budget ang indi na makonsiderar nga standby funds.
Dugang pa niya nga gintindugan sadto sang mga mamalidha nga pwede lang pasakaon ang unprogrammed funds bangod ini ang indi lakip sa regular budget.
Apang suno diri, ang mga pondo ang gingamit sang mga mamalidha bangod dakon nga bahin sini ang nagakadto sa komisyon.
Iban sa mga opisyal ang halos katunga ukon sobra pa sa tunga ang ginakabi, luwas pa sa ghost projects nga 100 percent gid ang ginabulsa sang mga politiko.
Panindugan ni Colemares nga dapat kasuhan sang plunder ang tanan nga mga nagpangawat sa kaban gikan sa Duterte Administration tubtob sa Marcos Administration.
Una suno diri nga dapat manabat ang mga yara sa Bicameral Conference Committee nga nagpalusot sang tuman ka dako nga budget insertions, mga mamalidha nga nag-author kag nag-aprubar sang unprogrammed funds, kag mga politiko nga nanginpulos sa na-aprubahan nga budget, kag ginbulsa ang kwarta.
Indi man dapat makaluwas sanday former President Rodrigo Duterte kag President Ferdinand Marcos Jr. nga nagpirma apisar nga nakita na ang maathag nga kurapsyon.
Dugang pa ni Colmenares nga indi dapat makontento kun mapasakaan na sang kaso, bangod ini ang mahimo lamang nga idismiss, sa baylo dapat nga bantayan kag indi mag-untat tubtob nga maconvict kag mapriso ang mga imbulbado.
