Ginklaro ni Department of Agriculture – Negros Island Region Director Albert Barrogo nga santo sa forecast, dry spell ang maeksperyensyahan sa Oktubre kag mayorya sang Nobyembre sa Negros Island Region, samtang mangin drought na sa ulihi nga semana sang Nobyembre tubtob sa Abril.
Sa dry condition pa lamang may ara na sang reported nga mga kapierdihan, nga ginareport sang mga mangunguma sa provincial agriculture office, kag ginpadala sa ila.
Suno diri, indi makaagwanta ang humay sa masakit nga init, samtang ang mais naman ang sarang pa nga makasurvive sa sulod sang 75 ka adlaw.
Pahayag ni Barrogo nga ginplastar na sang National Irrigation Administration (NIA) ang mga lugar nga mahatagan sang bastante nga tubig, kag dira sila magafocus sa paghatag sang bulig.
Samtang sa mga rainfed area ukon nagasalig lamang sa ulan, ginapanugyan ang iban nga drought resistant crops kaangay sang monggo, watermelon, okra, kalabasa, kamote, petchay, alugbati, talong, kag iban pa, nga madasig lamang maharvest.
Sa mga may bastante nga tubig, sila ang magahatag sang libre nga palay seeds kag corn seeds kasubong man sang abono.
Ini agud mapasaka ang produksyon sa mga rice farmers nga magapadayun sa pagtanom, bilang bawi para sa mga farmers nga temporaryo magapatigayon sang diversified farming.
Apang ang ila lamang mahatagan sang bulig amo ang mga mangunguma nga rehistrado sa Registry System for Basic Sectors in Agriculture (RSBSA).
Sarang paman makahingagaw basta magproseso lamang sa pagparehistro.
