Nagakoordinar ang Department of Agriculture – Negros Island Region Director Albert Barrogo sa mga gobernador sa rehiyon angot sa mga plano kag preparasyon sa El Niño phenomenon.
Sa interview sang Bombo Radyo Bacolod kay DA-NIR Director Albert Barrogo, 62,000 hectares ang agricltural land area sa Negros Occidental, samtang 30,000 hectares naman ang sa Negros Oriental.
Nasugilanon na sini ang mga gobernador kag may mga nakaplastar man ang mga ini nga programa bilang mitigating factor sa halit sang El Niño, kag bulig sa mga mangunguma nga mahalitan.
Lakip na diri ang pagpatigayon sang cloud seeding activities.
Samtang pahayag sini nga madamo pa sang mga water sources sa Negros Oriental nga wala gid nagaka-utilize para sa agriculture purposes.
Plano nila nga matutukan sa masunod nga tuig nga ma-tap ang nasambit nga mga water sources para sa irrigation system, sa koordinasyon man sa National Irrigation Administration (NIA).
Sa pihak nga bahin, ginalauman naman ang pagkapatay sang mga hilamon nga ginakaon sang livestocks partikular na sa Negros Occidental kaangay sang baka kag kanding.
Gani karun palang ginapanugyan na nila nga masuguran na ang pagtipon sang livestock porridge or silage, ukon kumpay agud may makaon ang mga kasapatan apisar nga may-ara sang El Niño.
Nakaprocure naman sila sang mga bulong para sa kasapatan nga mahimo mangin available na antes magtakop ang 2026.
Aminado man si Barrogo nga limitado pa ang budget sang ila ahensya, gani panawagan nila sa mga local government units nga magpangaman man batok sa El Niño.
