Ginhatagan na sang special permit ang 222 ka mga vendors nga magabaligya sang bulak, kandila, kag kakanin sa mga designated areas para sa UNDAS 2026.
Ang mga vendors ang magasugod naman sa pagbaligya subong nga adlaw, Oktubre 29.
Ang pagpanagtag sang special permit ang ginpangunahan ni Bacolod City Mayor Greg Gasataya sa lobby sang Bacolod City Government Center kaina sang aga, kaupod kay City Administrator Atty Mark Steven Mayo nga amo ang nagfacilitate kag Councilor Celia Flor, ang chairperson sa Committee on Markets nga representante sang Sangguniang Panlungsod sa naaprubahan nga resolusyon, kag yara man ang mga personnel gikan sa Business Permits and Licensing Office.
Ang 222 ka vendors ang natunga sa 31 nga magabaligya sa Burgos Public Cemetery, 24 sa Burgos Public Market, 33 sa Gonzaga Street, 50 sa San Juan Street, 52 sa Hernaez Street, 22 sa Mabini Street, kag 10 sa Handumanan Public Cemetery.
Sila ang maga-umpisa subong nga adlaw kag magalawig tubtob sa Nobyembre 2.
Ang mga vendors ang ginhatagan sang physical permit nga ila ipaskil sa pwesto, kag may-ara man sang ID, bangod ang wala sini ang indi pahanugutan nga makabaligya.
Sa interview sang Bombo Radyo Bacolod kay Councilor Celia Flor, nagalaom ini nga mangin compliant ang mga vendors kag magtinir lang kun sa diin ang ila nga pwesto.
Ang kada vendor ang ginhataan sang 1 meter by 2 meters nga pwesto.
Nagapati ini nga magasunod ang mga vendor base sa ila experience nakaligad nga UNDAS.
May 20 naman ka mga vendors gikan sa Murcia nga ginpahanugutan sa pagbaligya sang bulak sa Libertad Public Market.
Suno kay Flor, nagrequest nakaligad nga tuig ang alkalde sa banwa sang Murcia nga mapahanugutan ang ila nga vendors, ilabi na nga sa ila nga banwa man ginakuha ang iban sa mga bulak nga ginabaligya sa ciudad sang Bacolod para sa fiesta minatay.
