Natumba ang concrete nga poste sang kuryente matapos ginsalakay sang pickup sa Granada-Alangilan Road antes ang Charito Heights Subdivision sa Brgy Granada, Bacolod City alas-2:45 kaina sang kaagahon.
Ang Toyota Hilux ang ginamaneho ni Joaquin Dominic Faduga, college student, residente sang Pandayan, Brgy Buenavista, Himamaylan City; samtang sakay naman sini ang iya schoolmate nga si David Paura, 20 anyos, residente sang Prk Sulom 1, Brgy Villamonte, Bacolod City.
Sa inisyal nga imbestigasyon sang Bacolod Traffic Enforcement Unit, ang pickup ang nagabyahe sa east to west direction.
Madasig ang padalagan sang driver sa pihak nga likuan ang dalan, kun sa diin nadulaan sang kontrol ang driver kag nabungguan ang signage antes nagderetso sa concrete nga poste sang Negros Power.
Sa interview sang Bombo Radyo Bacolod kay Joemarie Bantillo, Barangay Tanod sang Brgy Granada, apisar nga 500 metros ang kalayuon nila sa lugar, nabatian pa nila ang tingog sang royda kag ang mabaskog nga paglagabong sang magbunggo ang salakyan sa poste.
Ini ang ginsundan sang pagkadula sang kuryente, nga madasig man nakabalik.
Gilayon man nila ginrespondihan ang insidente, kag sila na ang nagbantay sa dalan, samtang gindala naman sa ospital ang duha ka sakay sang pickup.
Sa impormasyon ni Bantillo, si Faduga ang may gindul-ong sa isa ka inland resort sa Brgy Alangilan kag papauli na kuntani.
Indi man sini maseguro kun impluwensyado sang makahulubog nga ilimnon ang driver.
Samtang bangod sa pagkatumba sa poste, sila ang nag-extend sang duty hours agud magiyahan ang mga motorista ilabi na nga gamay nalang ang malabayan nga dalan, kay may mga nagaloyloy nga linya sang kuryente.
Dugang pa niya nga delikado kun wala sang bantay bangod kurbada ang dalan kag mahimo nga masurpresa ang mga motorista nga madasig kun magpadalagan nga magaresulta pa sa dugang nga aksidente.
