Nagdeploy sang tig-walo ka police personnel ang Murcia Municipal Police Station sa tatlo ka mga sementeryo sa banwa subong nga UNDAS 2026.
Sa interview sang Bombo Radyo Bacolod kay Police Staff Sgt. Leo Ondrade, police personnel nga nadeploy sa Murcia Public Cemetery, walo sila ang gindeploy sa nasambit nga sementeryo, nga natunga sa nagabantay sa gwa kag sulod.
Nagdeploy man sang tig-walo ka personnel sa San Miguel Public Cemetery kag Murcia Memorial Park.
Luwas sa kapulisan nakadeploy man ang mga personnel sang Bureau of Fire Protection kag Force multiplier.
Suno kay Ondrade, ang mga ini ang nakadetail sa sementeryo halin alas-6:00 sang aga tubtob alas-6:00 sang gab-i.
Sa pagtsekyar sang Bombo News Team sa Murcia Public Cemetery, kapin 20 ka mga stalls sang mga vendors nga nagabaligya sang bulak, kandila, kag kakanin ang nagalinya sa kilid sang dalan antes ang entrance.
Lain man ang entrance kag exit sa sementeryo.
Sa karun, indi pagid tuman ka estrikto sang pagbantay sang mga security personnel bangod dyutay palang ang mga nagadu-aw sa minatay.
Apang sa pagdamo sang mga nagabisita, sila ang mangin estrikto naman kag magatsekyar gid sa mga bags.
