Pito ka mga drivers ang nagpositibo sa initial results sa ginpatigayon nga random drug testing sang Land Transportation Office Negros Island Region, kaupod ang Philippine Drug Enforcement Agency (PDEA) kag Philippine National Police sa Bacolod North Bus Terminal, Brgy. Bata, Bacolod City, kahapon sang aga.
Ini ang kabahin sa Oplan Harabas-Undas 2026.
Sa interview sang Bombo Radyo kay Ageent Jan Keith Capili, Spokeperson sang PDEA NIR, 100 ka mga drivers lakip na ang mga taxi, truck, modernized PUV, kag traditional PUV drivers ang ginpaidalom sa drug testing.
Pito diri ang nagpositibo nga ginlakipan sang apat ka mga tricycle drivers, isa ka taxi driver kag duha ka truck drivers.
Suno kay Capili, ang urine specimen sang mga ini ang pagadal-on sa laboratory para sa confirmatory test.
Kasunod sini, sila ang i-endorse sa ila tagsa ka Local Government Unit kag ipadalom sa intervention.
Mensahe ni Capili sa publiko nga ang PDEA NIR kag iban pa ng law enforcement agencies ang padayon sa hugot nga pagpatuman sang kampanya batok sa ilegal nga druga para sa kaluwasan sang publiko kag mga pasahero ilabi na subong nga holiday season.
